立法會大會上星期三轉房開會後，青政兩名議員梁頌恆同游蕙禎，連同幾十名助理，突然強闖立法會二樓會議室，衝撞期間令多名男女保安受傷後，據知全部受傷保安都已出院休養。立法會噚日再喺呢間「出事」會議室召開內會，早喺會議開始前15分鐘，保安已明顯加強，但大部份時間都只見男保安駐守，全部出入口至少有兩名保安。
至於一班女保安去咗邊？原來佢哋入咗噚日因為無會開、所以傳媒不能進入的「黑房」攝影室內候命，估計係提防游蕙禎再衝擊時，能及時出嚟阻截。青政兩名議員同佢哋班助理，噚日有再現身二樓會議室外走廊，但就全程好斯文，游蕙禎讀出紙上聲明，梁頌恆讀出電腦上的發言稿後，答咗記者一陣問題，兩人就同助理上番辦公室做嘢。