衞生防護中心總監梁挺雄（圖）即將退休，下星期二就開始展開退任前休假，總監職位由現任衞生防護中心特別預防計劃顧問醫生黃加慶接任，下周一就係佢最後一個工作日。呢位總監同好多退休政府高官唔同，佢話自己係政府做咗30幾年，有好多美好回憶，實牙實齒咁話退休之後，係唔會加入私營或商業機構嘅！
梁挺雄話自己興趣係教育同科研工作方面，退休後會考慮喺其他崗位推動公共衞生，例如參與大學工作，為社會出一分力。今年59歲嘅梁挺雄，1984年加入衞生署，2012年接替辭職嘅曾浩輝，成為衞生防護中心第三任總監。4年嚟都處理過唔少事，包括流感、中東呼吸綜合症、寨卡病毒同開展大腸癌篩查計劃。至於繼任人黃加慶，本身就係愛滋病專家，專注研究愛滋病同預防工作，亦會參與臨床診症，每季仲負責公佈最新愛滋病數字。