有頭髮邊個想戴假髮呀？ 娛圈都有唔少人戴假髮， 不過唔一定係冇頭髮或者貪靚嘅， 因為有時可能配合劇情需要先至要戴，而有部份有頭髮問題嘅藝人，更成為不同植髮公司嘅代言人。
黃夏蕙
夏蕙姨貪靚就梗架啦！為咗配襯唔同嘅造型，夏蕙姨就試過戴咗好多唔同類型嘅假髮做採訪，認真專業。此外，夏蕙姨仲曾經當住記者面前表演洗假髮， 個心都離一離呀！
鄭少秋
螢光幕前風度翩翩嘅秋官，但原來平時佢出入都會戴上頭套，來掩飾佢都受到禿頭困擾。2006年，佢就被爆在家除假髮現禿頭，但係秋官就完全冇嬲怒，反而仲話自己要戴假髮，除咗貪靚之外，仲同面相有關。秋官仲解釋當年因用錯電鬚刨剃頭，最後令頭髮稀疏。
岳華
邵氏年代嘅小生岳華，佢就曾經自爆因為以前拍古裝片，常要戴頭套，搞到毛孔焗住令頭髮脫落變成光頭。之後佢就搵咗增髮公司幫佢，所以佢o依家都有有唔同嘅髮型亮相。
夏雨
「Joe鮑」夏雨喺07年，成為一間植髮公司嘅代言人，當年佢出席代言人記者會時，就好尷尬咁當住傳媒除下假髮，認真勇氣可嘉！
李子雄
李子雄04年就幫台灣一間護髮中心做代言人，當時就話該公司係利用產品同療程健髮，不過亦有指李子雄只係戴假髮拍廣告。