【本報訊】競逐連任藝發局戲劇界代表的黃秋生一直被視為「梁粉」，他接受《蘋果》專訪時被問到會否擔心梁粉之名影響選情，黃說：「如果大家覺得四眼仔唔應該識影相，咁冇辦法啦，咁四眼仔同影相有咩關係箒？即係你要睇我呢幾年做過啲乜，似唔似樣呀嘛，而唔係乜粉唔粉。」他又指若選民因此不選他，「咁多蠢人都冇辦法，咁蠢人係會應該有佢哋嘅報應」。
參戰選委 無答是否撐CY
被問是否支持梁連任，黃沒正面回應，只稱將會參選文化界選委，「邊個政綱擺出嚟對文化界有着數就選邊個，就係咁簡單」，又指「唔好問我醫療、地產、政治……留番嗰啲23條、28條畀啲議員去選，起樓嗰啲留番畀建築界去揀」。
若然梁振英提出文化政策政綱，黃秋生指，「咁就睇邊個（政策）好……但唔好話畀我聽以後商場有個鋼琴，你可以去街頭表演，咁梗係唔制啦」。但他直言，若有人當選後走數是「冇得搞」，又指美國總統也經常走數，「條條契弟做呢啲都走數，世界上冇契弟唔走數，睇你走幾多，走一半定走大半，問題係你信唔信（候選人）」。
至於梁振英過去4年投放藝術發展的資源是否足夠，黃即答了兩次「零」，「有咩？有extra（額外增加）咩？」他隨後又想起藝發局主席王英偉曾指梁振英為藝術發展做了很多事情，包括改裝大埔官立中學作藝術發展中心等，「我覺得係零咋，可能係錯」。
黃秋生的對手李俊亮則指，不覺得梁振英施政報告在文化藝術發展有投放實質資源或策略，「佢好似唔係好了解文化藝術點發展」，又指梁曾說「體育冇經濟貢獻」，反映他着重經濟效益，反問「係咪就咁睇文化藝術對社會生活（影響）？」對於是否支持梁振英連任，他說「我覺得有更加好嘅人選」，認為現時特首選舉制度下，難以選出一個真正有認受性的人。
■記者張文鈴