全世界都怕咗特朗普，除咗佢嘅支持者，網民形容佢哋係「Trumpanzees」。ABC民調顯示，特朗普前日以46%比45%支持率反超前希拉莉後，昨日兩人打成平手，都係46%。博彩公司Paddy Power話，今個星期幾乎所有賭注都買特朗普贏。
選情反覆，市場避險情緒高漲；加上聯儲局雖然維持利率不變，但加息理據增強，利率期貨顯示下月加息機會高達78%，觸發市場risk off情況加劇。美股標指已連跌七日，期間無一日見過即市反彈，全程捱沽，20年來首見，兼且走勢一浪低於一浪，技術上利淡。港股昨跌破8月24日低位22702重要支持，後市亦偏淡。
誰主白宮，最快本港時間下周三開估。一旦特朗普當選，最大風險係政策不確定性。市場估計，美股最低消費係跌一成，並引發環球股災，最不利係中資股，皆因佢曾經講過，中國關稅被低估咗15%至40%。大和早前推算，最壞情況下，美國對中國關稅由目前嘅4.2%調升至最高嘅45%，對中國GDP損害將達4.82%；以最保守嘅15%計算，對中國GDP損害則為1.75%。
現在宜先減持股票，增持現金，或以衍生工具對沖持倉風險。我近日都減磅，伺機低吸優質股，心水係騰訊（700）。雖然騰訊係中資股，但主要從事互聯網業務，唔受關稅影響，唔怕特朗普上場。
內地股市缺乏大型科網企業，三大科網巨頭BAT──百度、阿里、騰訊，前兩者喺美國上市，後者則喺香港上市。深港通本月下旬開通，南下資金勢將追捧科網龍頭騰訊。
騰訊處於高增長期，第二季多賺42%，本月16日將公佈第三季業績，彭博綜合券商預測，料第三季多賺43%。該股上周五跌穿50日線，本周弱勢持續，昨低見200.8元，收202元。技術走勢已形成「頭肩頂」，並跌穿頸線，短期或有後抽，再下試量度跌幅目標192元，可候此價位撈貨。
代《魑魅魍魎》一周
割柑人
本欄逢周四刊出