港交所（388）豁免中銀香港（2388）新任公司秘書，在未獲相關公司秘書資格及經驗下接任一事，在市場引起不少迴響；堂堂香港藍籌也可取得豁免，日後若有其他公司提出同樣要求，港交所也難一一拒絕，港股市場頓成「無掩雞籠」。有人更擔心，事件是否涉及中行「大石壓死蟹」迫港交所就範，甚有財金界「人大釋法」影子。
有熟知上市規則的朋友跟密西比說，今次事件可謂禮崩樂壞。他說：「規矩就係規矩，唔係話之前有咁樣先例，就可以隨隨便便咁畀豁免，之前嗰啲係咪藍籌先？係咪又係國企？批準理據又係咪一樣？個個走嚟都話要豁免，咁大家就唔使守規矩啦，港交所又變番人治？」
友人越講越㷫。他說：「即係咁，既然咁多公司都畀（豁免），係咪代表條例不合時宜？係就快快手做諮詢修例啦！唔想改，咁即係話條例係有存在價值啦，但又係咁畀豁免，咁樣一來對其他上市公司唔公平，二來投資者保障點算？港交所自己都知衰咗，再主動澄清咗一轉，結果越講越衰囉。」
話分兩頭，連一個合資格人士也找不到，中銀香港無人才乎？
密西比