中資海外Shopping都唔係咩新鮮事，今次輪到英超的修咸頓，外電仲話班主Katharina Liebherr仲喺過去幾星期參與談判，正同深圳上市的萊茵達體育傾緊，賣價可能達2億英鎊（約19.35億港元）。
香港人鍾意睇英超，雖然話修咸頓近年表現認真一般般，都仲有人憧憬佢係黑馬。不過，大家睇吓國足，連強國子民都跌到一地眼鏡。如果真係賣得成，真係要同修咸頓講句恭喜晒……
中國國家主席習主席的「足球夢」，其實係用資本堆砌出嚟，大陸係咁印銀紙，連啲電器商蘇寧都出去買國米，連AC米蘭近期都話係中資攞到。外國人趁習主席發緊「足球夢」執錢，但都仲有啲人好清醒，好似意甲國家隊隊長、現效力意甲祖雲達斯的門將保方就對國米賣身中資好唔順，話係「意大利足球、國家、甚至是傳統等所有東西的挫敗」，聽到人心都疼埋。
難聽啲講，有本事就搞好中國隊，反正好似內地萬達集團都公佈咗要搞「中國盃」，中國式足球又何需外人欣賞呢。你出得起錢，買得個人，買唔到個心，咪又係嘥氣。