前傳媒人張寶華同佢4歲大姪女舉行嘅畫展噚日開幕，作品會作慈善拍賣，收益捐畀惜食堂。唔少名人都被揼心口買畫，好似自由黨田北俊、港鐵主席馬時亨等，佢哋噚日都有現身撐場；食物及衞生局局長高永文亦有到場參觀，肥馬一見到局長，即刻同佢講起大閘蟹，講笑話𠵱家唔敢食住，因為唔想咁早捐贈器官呀。
退下火線唔做議員嘅田少，一於少理立法會亂局，反而關心「薯片叔叔」跑唔跑馬仔。至於盛傳嘅黑馬金管局總裁陳德霖，田少話冇聽到風聲佢會參選，若傳言話薯片叔叔都不被鼓勵，背景相近兼做過煲呔「大內總管」嘅陳德霖獲開綠燈嘅機會係咪仲細？邊個去馬真係要拭目以待，但佢話今屆中央比上屆更緊張選委會選舉，連該黨嘅參選名單都要睇過先喎。