早幾日特首梁振英寫咗篇網誌，提到「做決定總會引起爭議，而且得罪人」，又話「雖然有爭議，雖然得罪人，但作為政府首長不能迴避」，譬如開發土地、港獨、立法會宣誓等，講到自己好有為，唔覺爭議係佢自己搞出嚟。
其實5年前嘅今日，梁振英對手唐英年被桃色新聞困擾之時，前特首曾蔭權就喺社交網站po咗一條佢回應「小特首」問題嘅短片，寄語從政者要「潔身自愛，以身作則，一言一行都要深思熟慮」，並以謙卑的心服務市民，同時又指要做困難決定嘅時候，雖然未必立即獲得每個人認同，但若然知道個決定係為咗社會長遠利益，「你就要勇往直前地做」。
同人唔同命、同遮唔同柄，一樣嘅意思，出自兩個人把口，就有兩種唔同效果。當年唔少人都好認同煲呔呢番話，認為佢係向兩位特首熱門嚟個當頭棒喝，唔知CY當年今日有乜感覺？