施丹執教皇家馬德里嘅第100場比賽（57場Ｂ隊；43場一隊），真係激過坐過山車，有個寫意開頭，但嚇到鼻哥窿都冇肉嘅結尾。周三歐聯作客歷基亞，皇馬有加里夫巴利一開波轟入世界波，一度領先兩球，但之後輸番三粒，好在高華錫完場前扳平3:3，皇馬先喺波蘭執番一分。
巴利57秒入世界波
巴利呢場好腳頭，開波57秒，佢接應基斯坦奴朗拿度（C朗）頭槌，禁區外第一時間起左腳窩利抽射，應聲入網，係皇馬喺歐聯史上嘅最快入波。35分鐘，巴利突入禁區傳中，畀賓施馬射成2:0。皇馬全場圍攻，C朗有九次攻門，但佢腳風唔順，始終冇入波。相反歷基亞嘅反擊就拳拳到肉，四次中目標射門就攻入三球，其中摩奧連喺83分鐘為主隊射成3:2；創施丹執教皇馬後單場失波最多嘅紀錄。由領先兩粒到輸返轉頭，唔通施丹第100場教皇馬要輸波？好在高華錫爭氣，喺85分鐘追平3:3完場，總算攞番一分。
施丹賽後話樣樣都唔掂，領先後太心散，「呢場波好奇怪，我哋踢唔出期望嘅表現。我哋所有嘢都差啲，當你入咗兩球後，唔可以放軟手腳，但我哋就衰呢樣，之後佢哋就入波喇。係我錯，但好在最後唔使輸。」
逼和歷基亞出線hold住
皇馬喺F組以八分排第二位，出線hold住，但同組嘅多蒙特就提早出線。多蒙特今場突然雪藏射手奧巴美揚，但靠阿祖安拉莫斯建功，周三主場以1:0擊敗士砵亭，以10分排榜首兼率先打入16強。有傳話奧巴美揚係因為開會嗰陣玩手機所以被罰，但主帥杜曹話雪佢係有內部原因，唔回應係咪同紀律有關，同埋佢強調奧巴美揚會喺嚟緊聯賽上陣。
至於G組嘅李斯特城都有10分，但就未出得線住，呢支英超冠軍繼續冇失波，作客同哥本哈根踢成0:0，四戰三勝一和，晉級機會高唱入雲。至於另一支英超球隊熱刺就大鑊，佢哋喺溫布萊迎利華古遜輸0:1，喺E組得四分，跌落第三位。