作為唔少人嘅鄉下，日本四季都有靚風景睇，閒閒哋淨係為咗櫻花同紅葉，一年都去至少兩次。但入境望住條水蛇春咁長「外國人」長隊，對買少陣嘢都唔得嘅香港人嚟講，絕對係漫長嘅煎熬。費清要同大家講個好消息，去日本終於都有Fast Pass啦！
日本法務省由11月1日起推出「Trust Traveler」計劃，成功申請人士，去日本可以喺成田、羽田、關西、中部機場，使用自助通道入境，類似香港e道咁過關唔使再排長龍。
申請人要持有67個指定國家或地區嘅護照（包括香港同英國，但係就冇中國份...囉），喺過去12個月去過日本兩次或以上，而又冇喺日本境內犯過法被遣返，呢三個條件香港好多人都得。
比較麻煩嘅係，你仲要喺以下嘅機構工作超過一年，並會繼續做落去，包括(a)日本公共政府機構、(b)上述67地區公共政府機構、(c)國際組織、(d)日本上市公司、(e)上述67地區嘅上市公司、(f)有5億日元資產嘅公司、(g)有合理理由經常去日本嘅旅客。
如果符合嘅，恭喜晒，去馬啦。申請方法好簡單，只要去呢個網址（ http://www.immi-moj.go.jp/ttp2/en/index.html ），先申請一個User ID，再登入系統填交個人資料、身份及工作證明文件等等，獲確認後，去到日本機場嘅專櫃辦理手續就搞掂，有效期三年。之後，出入日本就方便好多喇。
費清＃要生計，也要生活＃毋忘初衷