下月滿32歲嘅里約殘奧硬地滾球金牌得主梁育榮，噚日喺體院出席賽馬會優秀運動員獎勵計劃頒獎儀式，獲頒約41萬港元獎金，佢話會用嚟下年娶老婆。對於有報告提出推行全職傷殘運動員計劃，喺小童群益會工作嘅阿榮當然歡迎；佢話𠵱家一星期練到10粒鐘，轉全職可能練到廿粒鐘以上，大大提高爭取四年後東京殘奧金牌嘅機會。噚日共有18位選手瓜分182萬獎金。