廢青成日話自己冇父幹，羨慕富二三代一出世就有「我Daddy~間公司」等住佢打理，有調查顯示，其實香港班富二三代，少過一半會加入家族企業，原因可能係……想做藝術家！
羅兵咸永道訪問全球2,800家企業，其中香港企業佔52家、內地企業佔48家，發現香港家族企業裡面，只有44%有第二三代人加入，遠低於全球平均69%。羅兵咸永道中國內地及香港私人財富服務主管合夥人王志偉解釋，因為好多港企嘅下一代都會出國留學，唔少都成為專業人士，或者追求個人事業，例如做藝術家咁，唔打算返公司。
所以，其實家族企業都係一個圍城，裏面嘅人想出去，出面嘅人想入來。
另一方面睇，富二三代曝光，除咗來自傳統世家之外，多數就係爭產先會蒲頭，所以羅兵咸建議，家族企業最好盡快制訂繼承計劃。淨係講香港企業嘅話，有23%打算出售公司，分錢分家好過，但只有6%打算以上市形式分家。