港姐出身嘅許亦妮，出道至今，無論緋聞同是非一大籮，之前就講過佢因為獅子開大口，續約時要求大台加薪4倍而被雪藏，最近佢更消失於社交網絡。其實紅到連「民間特首」劉德華，當年都試過因為得罪大台，而被雪藏，曝光率近乎零。
劉德華
本身係無綫藝員訓練班出身嘅劉德華，85年正值當紅嘅佢，就想將同大台嘅5年期合約縮短被拒後，後果就緊係遭公司放入雪櫃啦，只係偶爾安排佢參與體育、兒童聯歡會等活動，曝光率係零。
廖碧兒
2008年，廖碧兒因為唔肯續約大台，而遭雪藏，有指當時佢有份演出嘅劇集《談情說案》都變成客串，但係當時廖碧兒嘅助手就話佢只係腰傷而要休息一輪喎！
蒙嘉慧
2013年，大台收到風知道蒙嘉慧不再續約，仲轉投王維基嘅香港電視，於是立即煞停蒙嘉慧有份嘅新劇《仁心解碼II》所有宣傳，又取消她影《TVB周刊》封面，全面封殺。搞到連YoYo嘅老公鄭伊健都忍唔住開口話：「佢哋有少少奇怪，一邊叫人續約，一邊又唔俾宣傳，咁點續約！」
馬國明
去年有傳馬國明因為拒絕同大台再簽長約，就被大台雪藏，連佢同周麗淇主演嘅劇集《流氓皇帝》就遲遲都唔播，搞到連周麗淇都嬲嬲豬。之前喺深圳拍攝王晶監製嘅《賭城群英會》，要委屈入住每晚100元的賓館，但係大台嘅小生買少見少，大台讓步俾馬明更大自由度，最後馬明續約獲解禁，仲接拍新劇《心理追兇 Mind Hunter》做男一。
唐詩詠
去年7月，唐詩詠因為唔肯同大台續約，結果就緊係俾大台雪藏啦，所以佢就拍完《公公出宮》後，就冇再安排佢拍任何新劇，之後就安排佢拍拍《廉政行動2016》5集短劇，同客串《城寨英雄》。直至最近先再拍新劇《不懂撒嬌的女人》。
鄧健泓
自陳志雲離開大台後，佢啲「迷雲黨」愛將就先後被冷藏，鄧健泓就係其中一個，講到佢近年拍嘅大台劇集，就係《使徒行者》嘅黑警角色，今年3月終於約滿大台，o依家就自己開製作公司，幫吓未婚妻石詠莉出碟。
沈震軒
一心以為泊到太陽娛樂文化嘅「洗米華」周焯華好碼頭嘅沈震軒，傳佢因為形太花心，慘被太陽娛樂雪藏。之後佢就改口風話自己嘅經理人合約係無綫，話同太陽娛樂只係電影同音樂上嘅合作，但到無綫要佢加簽長約時，佢又扭計豬，咁最後連大台都將佢放埋入雪櫃，今年11月正式離開大台。