體壇拾趣︰美帝鞋+繁體字
易帝打碎玻璃心

早前俾湖人裁走嘅易建聯完成CBA註冊手續後，周三跟廣東隊作客深圳，但場波竟然因為一對李寧波鞋而變成鬧劇！「易帝」喺比賽期間除咗對李寧波鞋後離場一事惹起軒然大波，而佢事後喺微博用繁體字道歉，就令強國班玻璃心網民更加嬲。

怒除李寧鞋罰停賽一場

中國籃協今季改例，要求所有中國球員打CBA嗰陣都要着贊助商李寧嘅波鞋，冇得好似以前咁貼住其他牌子嘅商標就過關。身為Nike代言人嘅「易帝」呢場作客深圳上演回歸CBA首戰，開波時都跟足籃協規則着李寧波鞋，但佢喺第二節開賽一分鐘左右，就突然踎低除咗對鞋，就咁着襪離開球場！易帝之後換咗一剔鞋想出場，點知球證唔畀，直至第三節同籃協商量後先獲准着上遮咗商標嘅「一剔」鞋上陣，但廣東最後都係輸88:89。
呢場攻入13分嘅易帝事後喺微博道歉，話對腳太痛先會做出唔適當嘅行為，點知佢用繁體字耍冧又得罪強國網民，俾人質問佢點解唔用簡體字，仲嗌佢咁勁就咪返嚟打CBA喎。至於中國籃協都企硬，周四發表聲明話易建聯要停賽一場，廣東隊亦被罰款五萬蚊人民幣（約57,340港元），仲話易帝之後唔着李寧鞋就肯定冇得上陣。