哥迪奧拿果然有料到！以前比歷連尼年代，曼城次次都被巴塞隆拿撳住砌，但喺周二歐聯風水輪流轉，哥帥麾下嘅曼城同巴塞鬥搶鬥快，靠根度簡梅開二度，主場以3:1反勝有美斯入波先嘅巴塞，報番上輪作客吞四蛋之辱。
根度簡𡁻兩粒最威威
上輪歐聯，由於門將哥迪奧巴禾派膠令到曼城踢少個，最後喺魯營捧咗四隻光蛋返屋企。周二呢次返到主場，曼城表現對辦，雖然佢哋被美斯入波先，但大衛施華、奇雲迪布尼同根度簡嘅中場三核發揮非常好，中前場緊逼好有效率。喺39分鐘，巴塞右閘沙治羅拔圖喺緊逼下誤傳，輾轉下落喺根度簡腳下射成1:1。追平後，曼城個勢返嚟，巴塞教練安歷基賽後承認呢個係轉捩點：「頭40分鐘，我哋踢出最好嘅表現，但喺失波後，我哋就再控制唔到場波，因為對手畀到嘅壓力好大，令我哋犯錯。」
巴塞呢場跑動冇曼城咁積極，攻中恩尼斯達同中堅碧基缺陣嘅影響都好大，拿傑迪錫同安祖高美斯取代唔到小白嘅作用，而防中布斯基斯亦有唔少失誤，令巴塞中場受制於曼城嘅逼搶，呢個問題喺下半場更嚴重。51分鐘，布斯基斯犯規，曼城喺禁區頂博到罰球，迪布尼主射入網，助曼城超前2:1。巴塞之後有安祖高美斯射中楣，追唔番平手，仲喺74分鐘被曼城入多球。捷西斯拿華斯傳中，阿古路用手撞後，根度簡抽入，曼城贏3:1完場。賽後阿古路承認波打手變助攻，但佢話手臂當時緊貼個身。
「我哋贏咗世界最好球隊」
曼城呢場用巴塞式嘅逼搶去戰勝巴塞，全隊跑動距離多過巴塞超過五公里，比對手跑多半個人出嚟；曼城全場13次射門，亦比巴塞多五次。哥帥賽後盛讚球隊表現：「我哋只係夾咗好短時間，贏到世界最好嘅球隊，呢場勝仗好重要！」面對巴塞，哥帥話呢場改變咗少少風格，「我哋呢場有好多長傳，因為我哋仲未可以做到巴塞嗰種控球。對手已踢咗25年咁嘅足球，我哋只係三四個月，所以要轉一轉打法去克制佢哋。」曼城家陣喺C組以七分排第二，落後巴塞兩分。