求驗客手記：
奧斯爾solo絕殺盧軍

周二歐聯分組賽，雖然A組嘅阿仙奴喺開賽15分鐘就意外落後兩球，但「槍手」憑格列沙加同基奧特各建一功，追平2:2完上半場，最後憑奧斯爾喺88分鐘個人表演，射入幫阿仙奴以3:2絕殺主隊盧多格德斯，兼連續17季晉級16強。

領隊雲格喺賽後都忍唔住大讚愛徒：「我梗係想奧斯爾早啲入到波啦，佢最終都搵到方法證明自己。」不過，阿仙奴連續六季都喺16強止步，唔知今年可唔可以打破宿命呢？
同組另一場比賽，巴黎聖日耳門（PSG）就憑住馬度迪同梅尼亞各入一球，作客以2:1擊敗巴素利。由於阿仙奴同PSG目前都以三勝一和得10分，兩隊穩奪A組嘅頭兩名，並提早出線16強。
馬德里體育會喺同日歐聯D組賽事憑基沙文梅開二度，主場以2:1擊敗羅斯托夫後續居榜首；而拜仁慕尼黑就憑羅拔利雲度夫斯基入兩球作客以2:1反勝燕豪芬，同馬體會雙雙提早出線16強。