執筆時美國聯儲局議息結果尚未公佈，不過市場估大選後嘅12月都肯定加息，稱唔上不明朗因素，市場眼中真正嘅變數，其實係邊個做美國總統。形勢好似好亂，越睇就越眼花，分析重點或許shift去兩樣嘢會來得更有效，第一，時間表；第二，圖表。
先講時間表，美國大選喺11月8日舉行，即係香港時間11月9日日頭點票，距今仲有大約4至5個交易日，越接近大選，消息越會左搖右擺，股市走勢亦可能會較神經質，至於大選過後，係咪一天光晒？以下嘅例子話畀大家聽，之後走勢只會更癲。
參考近年類似嘅二選一黑天鵝事件，記憶猶新嘅係今年6月份英國脫歐公投。公投前兩三個月，港股一直係上落市，公投結果揭盅，環球股市當日急跌，翌日開始又回復之前chok市走勢，再維持大約一兩星期，就正式進入新升浪。
另一範例就係2011年美國財政懸崖，早於當年4月初至7月中，港股早已形成一浪低於一浪之勢，雖然參眾兩院最後成功通過舉債上限上調，但之後歐債危機一樣令股市跌到四腳朝天。
值得留意係，兩隻黑天鵝有其共通特徵，就係重大事件結果只能影響股市一日走勢，其後港股只會承接事件之前嘅方向走落去，要跌嘅就跌，要chok嘅繼續chok。同時，大事件令交投量增加，牽動市場情緒，加快單邊市嘅出現。
至於過去兩三個月，港股趨勢係點？港股升浪9月初告終，上落市維持約一個月，近期逐漸由長方形走勢，變為一浪低於一浪，中期趨勢似乎向下。
如果將上述二選一黑天鵝事件嘅特徵，套用今次港股之上，無論最終係特朗普定希拉莉上場，大選結果只會影響港股一日咁大把，其後有機會承接最近一浪低於一浪走勢發展落去，較大機會係加快單邊跌市出現。咪以為希拉莉上場會一天光晒，之後分分鐘暗藏殺機。
晉佳
http://fb.com/advanceguy1