噚晚喺旺角場上演港超賽事，東方龍獅雖然失波先，但係射手洛迪古斯上半場已經入咗四粒，最終喺779名觀眾面前，以6:2反勝標準灝天，以六戰五勝一和成績，入16球失七球嘅球差下，壓過同樣得16分嘅傑志，升上聯賽一哥席位。
灝天近期鬧「門將荒」，今場以年僅19歲嘅歐陽峻彥把關，結果成為佢嘅噩夢。灝天喺13分鐘由賴菲爾先開紀錄，但一分鐘後洛迪古斯就憑單刀機會幫東方追平1:1。呢位射手喺20同28分鐘各建一功，完成帽子戲法；中場迪高亦喺33分鐘接應傳中衝頂破網，洛迪古斯喺44分鐘無人看管下再入一粒，半場東方已經以5:1遙遙領先。下半場灝天由艾華頓追返粒，但最後又畀麥基入返球，以2:6大敗一場。