青政兩個議員衝入會議廳，波及埋會計界梁繼昌同金融服務界張華峰罵戰，梁繼昌仲一度疑似插水跌低，最後要由其他議員勸開佢哋兩位，免再爆發其他衝突，立法會真係幕幕精采咯。
梁：借勢跌低免被扭傷
事緣立法會保安噚日拉住梁頌恆要佢離場時，啱啱企正喺張華峰個位前面。肥老闆話喎，梁頌恆當時大聲叫囂，影響佢嘅「開會情緒」，所以咪大聲叫佢出去、唔好阻住開會，引述對方第一句就鬧佢仆街，咁佢咪用番呢個字回應番。
此時梁繼昌走前鬧張華峰以仆街鬧青政，結果演變成佢哋兩個罵戰，兩個越鬧越激動仲手指指，肥老闆承認當時拍咗對方隻手，叫佢唔好指住我，之後唔知梁點解即刻瞓低，話同對方距離成一米幾，「唔知點解佢連呢啲渾水都抽埋」，但佢都話自己作為議員，都係衝動咗，下次喺呢啲場合會克制啲。
梁繼昌則同八方講，肥老闆捉住佢隻手嘗試扭佢手腕，形容對方「扭得好大力」，咪借勢跌低，避免被扭傷囉。佢笑稱單嘢其實好濕碎，笑指平時有「練嘢」，若然認真「講手」，跌低嘅可能係肥老闆喎。