香港經常鬧明星荒，這兩年難得冒出三兩個新鮮面孔。
上月剛23歲的「文青女神」袁澧林（Angela）是其中之一，在浸大讀會計的她，接連拍電影、ViuTV新劇，「細個都有發夢過做演員，成日諗，到底電視嘅人，係點樣入去㗎呢？」自問大膽好奇又貪玩，期待未來，「我適應力好強，喺地下都瞓得着。」
撰文：林妙萍
攝影：郭賢興
化妝：Min Kim@airportagency
剪片：李祉澄
袁澧林早前跟CHANEL到巴黎，出席2017春夏時裝騷，逗留幾天再轉飛古巴拍攝，「身處巴黎，係第一次嚟歐洲，我想再踏遍多啲呢片土地，去吓其他國家。」穿梭巴黎新舊區、運河旁，「感覺好正，呢度所有建築都係以前保留落嚟，一幢一幢都有幾百年歷史，唔似香港全部都係高樓大廈，政府胡亂去拆啲建築物。」
童年發夢做演員
身高170cm的Angela，一頭齊蔭短髮、巴掌小顏，辨識度高。兩三年間，由廣告的「美心少女」，成為「浸大校花」、「文青女神」，拍片機會也激增，「細個嘅時候都發夢過做演員，播電視劇時，見到演員啲表情，我都會一路睇、一路扮佢哋，但都係一個發夢嘅狀態。」人氣持續上升，「我唔會覺得自己係一個明星，唔會咁形容，我會用talent去介紹自己。」
大學生活與演藝，不想二擇一，「𠵱家一個星期開三日戲，11月開始有break，可以成個月拍，我係咁樣生存嘅。返學就當自己係學生，一要拍嘢就pick up個角色，冇特別諗太多。」不過，仍未慣太出名，「有時喺李作權大道，嗰度出咗名易撞到人，都會有師妹搵我影相，其實我着得好普通，唔知點解會認得我。」
瑪嘉烈的初吻？
袁澧林曾跟鍾景輝學戲，實況劇《三一如三》之後，今個月開拍《瑪嘉烈與大衛系列的前度》，演後生版瑪嘉烈，「我睇咗本書好多次，佢應該係24歲，我會放大佢好貪玩、三心兩意嗰方面。呢行，真係好好，可以接觸到唔同角色、進入唔同世界，我自己都係貪玩嘅人，鍾意新鮮感。」新劇應會有kiss鏡頭，「未有劇本，到時同導演傾吓先，書入面呢部份係留白嘅，所以未知。」
女神畏高怕曱甴
對於文青女神的光環，真人頗精靈活潑的Angela，坦言每次聽到，都覺得「幾別扭」，「其實我鍾意啲千奇百怪、冒險嘅事。比起平常人，我都算係大膽，例如我有畏高，但都成日忍唔住去玩過山車，次次一上到去就後悔，因為真係好驚，但之後都係照上。」大膽Angela學生時代玩過排球、手球、田徑，甚至足球，試過一個人去埃及做交流生，今年越南旅行，又騎電單車撞車，「咁當然嗰個係一個悲劇嚟，炒完車，返到嚟縫咗16針。」死穴？就是逢女生都怕的曱甴，「係超級驚，應該呢世都克服唔到。」
更多精采時尚內容，盡在 http://add.appledaily.com 。