Cindy(顧美蓮)二十出頭由家鄉哈爾濱移居去姑媽Boe媽(顧紹芬)位於深圳嘅寓所，2004年8月，由Boe媽介紹Cindy畀彤叔識，短短幾個月已經甚得彤叔歡心，成日跟彤叔去富豪朋友間嘅聚會，閒時陪彤叔去嘆茶及玩樂。
之不過，到2005年，彤叔又同華裔小姐冠軍葉璇傳緋聞，有指葉璇同彤叔個孫鄭志剛美國留學時嘅同學。同年9月，葉璇在彤叔八十歲大壽時，正式上契，成忘年之交，兩人仲喺除夕舞會跳舞。葉璇一次接受訪問時表示，當時共舞報道一出，彤叔有打俾佢:「佢第一時間打俾我，叫我唔好理，繼續做好工作。」
傳當時葉璇同Cindy「爭寵」，而葉璇經常喺彤叔有份出席嘅活動上，攝位坐在契爺身邊；2006年1月，彤叔帶Cindy出席澳門英皇酒店開幕典禮，搞到葉璇冇碇企。有傳葉璇把心一橫、認彤叔做「契爺」，一到場叫Cindy做「阿嫂」，又發功黐實彤叔，好不熱鬧。
但葉璇嘅版本，講到兩人上契緣起，佢就係話同彤叔係04年一次樓盤剪綵認識，一見如故，「我覺得佢係一個好受尊敬嘅人，好有智慧，和藹可親，喺我遇到困難同挫折時，好似感情上同工作上都俾到我好多意見，我一個人喺香港工作，十歲開始無父母喺身邊，識咗彤叔之後，有一個老人家關心我，過時過節會約我親戚朋友同佢親戚朋友一齊過，我哋好投緣，所以就上契。」
不過自從2006年底，葉璇出書《上善若水璇攻略》，契爺鄭裕彤為新書題字後，葉璇冇再出現喺彤叔身邊；一次鄭裕彤睇騷，被問唔見契女葉璇，佢話唔知契女葉璇下落，又稱對方「好似喺大陸」：反而Cindy於2011年初就曾陪彤叔去中環巡舖，直至彤叔中風之後，就冇再見到Cindy。