陪咗香港人17年嘅大熊貓佳佳上個月去世，海洋公園噚日宣佈，會保存佳佳部份遺體做科研、獸醫學教育以及保育用途，成為大體老師遺愛人間。
海洋公園話，經過同港府、四川臥龍中國保護大熊貓研究中心共同決定，會保存佳佳嘅生物樣本做組織病理學研究，而頭骨及牙齒就會用嚟作獸醫學教育及研究用途。
佳佳留低嘅毛都好重要，因為大熊貓BB喺出生頭兩個月仲未識爬同睇嘢，如果有大熊貓嘅皮毛放喺育嬰箱入面，唔單只可以為BB保暖，仲可以畀佢哋熟悉成年大熊貓皮毛質地，方便日後同媽媽一齊住。至於剩低嘅身體其他部份將會火化，經過處理後嘅骨灰會埋喺佳佳嘅故居「香港賽馬會四川奇珍館」附近土壤，並會喺上面種植一棵樹做紀念。