35歲的哈爾濱姑娘Cindy(顧美蓮)，23歲嗰年經姑媽Boe媽(顧紹芬)介紹下認識彤叔，命運因而改寫。
2004年，只有23歲的Cindy，由Boe媽穿針引線下與當年78歲的鄭裕彤「邂逅」，兩人年齡相差55年，彤叔可以當Cindy爺爺有餘，但因為Cindy善解人意又識得玩低調，即使彤叔帶其出席公開場合，Cindy都識得搵位走，從不為彤叔帶來麻煩。
並非絕色的Cindy，認識彤叔之前都有發過明星夢。18歲嘅Cindy在家鄉哈爾濱參選過美少女冠軍，拍過下啲大陸護膚品、婚紗店廣告，仍未建立知名度。3年後，Cindy南下深圳搵機會，並投靠Boe媽。至2004年8月，由Boe媽親自安排飯局與彤叔認識，表現好乖嘅Cindy o氹到彤叔好開心，短短五個月已成為其身邊紅人，彤叔更常在富豪界朋友前讚嘆佢係「章子怡鞏俐混合體」。
Cindy與彤叔「關係」曝光，始於04年8月Cindy在Boe媽陪同下，與彤叔去置地茶敍。未幾Cindy即經常陪彤叔左右，如同年9月彤叔帶埋Cindy佢出席《新警察故事》首映，又帶埋佢去上海，出席大劉嘅久光百貨開幕，漸漸為人所識。
有指因為彤叔唔鍾意，所以乖巧聽話嘅Cindy亦都唔再發明星夢，仲去學電腦同日文增值，令彤叔更為欣賞，更頻頻帶佢出席富豪老友飯局。最初只係住300多呎、月租$9,000嘅新世界服務式住宅，後來再搬到麥當勞道。有報道指06年嗰陣、出入有二手Benz代步嘅Cindy，仍然係攞住通行證來港，當年佢獲贈干德道一個銀主盤，入貨價$678萬；2011年Cindy以$1,350萬沽出，五年間淨袋六百幾萬。果然係醒目女。
從來少提私事嘅彤叔，和Cindy關係見光後卻高調發表「女友論」，當時佢話:「女友？梗唔係啦，朋友囉。如果佢都算係我女友，我都唔知幾多女友。」追問佢覺得Cindy靚唔靚，佢就笑指記者戲言：「你哋仲靚啦！」