賭王四房孻仔、21歲嘅何猷君，短短幾年已經換過好多個女友，最新鮮滾熱辣係佢同組合「少女標本」成員、25歲嘅袁紫僑（CoCo）拍拖，熱戀中嘅小情人仲經常喺社交網貼相放閃，但佢喺Instagram稱呼男友為「我的狗」，有報道話CoCo好大膽，竟敢叫何家少爺做狗！
猷君噚日接受訪問話：「睇咗呢個報道，覺得好多嘢唔使寫到咁貶意詞嘅，可以睇得得意啲，可以做吓research，全世界都知我係屬狗，唔止佢一個嗌我！」至於去迪士尼買大束氣球，猷君話：「啲人話佢似Minnie Mouse所以去買，呢啲只係正常男女拍拖嘢，唔使問咁多喇！」
「四哥都有個」
四太梁安琪前晚出席電影《地獄解碼》慈善首映，為贊助今次文化節嘅女兒何超盈撐場，同場仲有謝玲玲同女兒林心兒、王曼喜、龔慈恩同女兒林愷鈴、陳爽同周秀娜等。問四太係咪「開綠燈」畀猷君同CoCo拍拖，四太即反問：「邊個CoCo呀？四哥都有個CoCo喎！後生仔後生女拍拖係應該嘅，係一個過程。」四太又話猷君個個女朋友都見過，不過就未見過CoCo。問四太覺唔覺猷君換女朋友速度好快，有賭王嘅風範，好多女仔埋身，四太就話：「何生好專一㗎，特別係睇到我啦，我有幾專一，何生就有幾專一。」
撰文：馮仁昭