國家前總理李鵬之女李小琳一連兩日在港出席大唐集團旗下大唐環境（1272）嘅招股活動。前日投推，佢只做佈景版，噚日主持記者會就大開金口。
有記者直接問佢，對於前年被調離中國電力集團（市場解讀為降職），有何感想，佢似乎早有準備，表現輕鬆咁回應一句，話多謝外界對佢工作調動嘅關注，之後主動企起身向大家鞠躬，旁邊五位管理層都好識做，即刻拍掌。
佢之後就擔當主持角色，分派記者問題畀各位管理層解答，認真有大家姐風範。
呢位大家姐仲要係十分貪靚，佢前日一身黑色套裝配珍珠首飾現身，噚日改為一身米白色，首飾再簡約啲，只得閃閃耳環，明顯係諗過度過。