東亞（023）近年業績麻麻，好大程度都係因為之前搏命發展內地業務，內地經濟一轉差，盤數就即刻俾東亞中國拖低晒。
咁啱得咁橋，東亞中國董事會噚日宣佈，將副行長林志民，升正做東亞中國行長，而原行長關達昌就調任為東亞中國高級顧問。唔通東亞想換一換人救業績？
東亞就話係正常人士調動，兩位資深高層都效力東亞好耐，關達昌調任高級顧問後都會繼續幫手。
講番新行長林志民，佢係香港人，早於90年代初，已經被東亞派去內地工作，大大話話做咗廿幾年，一步步升上行長呢個位。
之前佢同傳媒透露過，初時普通話講得好差，要特登請補習老師教普通話，又因為在內地工作多年，同香港嘅女友因聚少離多而分開，但就冇update最新感情狀況。