嚟緊星期日英超有大波，就係阿仙奴對熱刺嘅北倫敦打吡。小弟同牽牛兄傾傾吓都講到兩隊嘅副選中鋒，牽牛當然係講佢愛隊嘅「銀河唯一」，而小弟就覺得熱刺嘅雲遜贊臣（前）好似之前嘅蘇爾達杜。
唔係講樣或者踢法，係講佢哋加盟熱刺初期嘅表現。蘇爾達杜以前都係西班牙神鋒，嗰陣喺華倫西亞大殺三方，2013年夏天以3,000萬鎊身價嚟到英超嘅熱刺，外界對佢都好有期望；點知開季頭七場聯賽入兩球，兩球都係12碼，俾人笑佢淨係識射12碼，喺2013/14球季，蘇爾達杜入咗六個聯賽入球，四個都係12碼。
今季加盟嘅雲遜贊臣就冇蘇爾達杜咁貴，轉會費1,700萬鎊，但加盟後表現一模一樣。由於哈利卡尼受傷，雲遜贊臣有好多上陣機會，聯賽加埋盃賽踢咗15場入三球，令人沮喪嘅係三個都係12碼。當然，小弟唔知佢周三場歐聯踢成點，但如果唔再努力啲，喺哈利卡尼復出後，佢真係冇乜機會踢。
雲遜贊臣係上季荷甲神射手，但呢個年代嘅荷甲金靴真係冇咗個優質保證。
以前嘅荷甲神射手係羅馬里奧、伯金、列馬倫、雲尼斯達萊，位位名將，但之後質量下滑，千禧年第一個10年，雖然有艾方素艾維斯同基士文呢啲極品，但都有蘇亞雷斯、古積特同亨特拉爾撐住。
近呢四五季就由一半掂一半唔掂變成個個都唔掂。巴斯杜斯同艾費特芬保加臣喺德甲都撈唔起，前者仲已經轉戰葡超；韋菲特邦尼初頭嚟英超踢史雲斯都好地地，但去咗曼城之後就唔掂，家陣喺史篤城撈緊；前季荷甲神射手係迪比，佢上季喺曼聯嘅表現真係有眼見……
文：咖喱