噚日立會喺亂局中收場，混亂期間都有一則笑料。主席梁君彥唔畀梁頌恆同游蕙禎入會議廳宣誓，民主派喺會內提出關於議員宣誓嘅規程問題幫拖，其中楊岳橋都坐喺佢個位提問，爭拗期間梁君彥爆咗句：「楊岳橋議員，請你坐低。」全場都爆笑，點解？當時都一臉驚訝嘅AY話：「我一直都坐低咗喎，主席。」（圖）
立法會噚日由一樓會議廳轉至二樓會議室開會後，AY質疑梁君彥唔應該以上次嘅裁決蓋過今次重新提出嘅規程問題，雙方一度爭辯，梁君彥及後索性話：「楊岳橋議員，請你坐低」，想就此完咗件事，點知事實係AY一直坐喺度㗎喎，難怪其他議員爆笑，朱凱廸仲寸爆話：「請你企起身呀，可能係。」
輪到民主黨涂謹申動議，要求政府表達對釋法立場嘅緊急口頭質詢時，不忘抽水問梁君彥：「我要企起身定坐低？」相信梁君彥坐企不分，會續成泛民抽水笑柄。