戰友咖喱提到荷甲神射手水貨多，咁法甲神射手呢？登陸英超嘅法甲神射手發展似乎順利啲。挾三屆法甲神射手之威名加盟曼聯，伊巴謙莫域近期陷入球荒，但以佢級數，只要「紅魔」搞番好中前場組織力，相信好快就會入番波；但最擔心係「寸王」雪藏朗尼後，又唔試用拉舒福特打正箭頭，如果場場都要用呢位35歲老人家打正選，英超對抗性遠比法甲大，恐怕季中已經抽乾「呂布」嘅體力。
講起用法甲兵，阿仙奴領隊雲格都可以叫做專家，基奧特（左）係雲格喺韋托特後收購嘅另一位法甲神射手。坦白講，廠迷對基奧特真係又愛又仇，歌仔都有得唱「銀河唯一基奧特」，可惜佢嘅把握力唔係頂級，單刀埋門成功率唔高，不過頂上功夫加上衝刺能力，又真係阿仙奴鋒線少有嘅。「兵工廠」上仗作客新特蘭，4:1大勝看似輕鬆，但其實1:1嗰陣都亂咗陣，好彩基奧特後備入替第一腳就幫阿仙奴再度領先，之後仲頭槌建功贏到3:1，幫手穩住三分。
今時今日球壇講求快速，所以雲格今季特登將阿歷斯山齊士推前踢正箭頭，同伊禾比、禾確特或者阿歷士張伯倫等快馬合作，反擊效果確實唔錯，但因為身材都唔高，主場對住對手「泊大巴」就輸蝕，慘被米杜士堡悶和0:0就係好例子；所以基奧特可以提供變招能力，不過要佢長期踢後備又似乎有啲屈就。
英國傳媒就建議雲格改踢雙箭頭，組成「銀河唯一山神」組合，周二作客盧多格德斯，基奧特同山神雙雙踢正選，不過「山神」就踢番左翼；無疑雙箭頭已經式微，不過既然車路士領隊干地可以打番起三中堅陣式，雲格試一試雙箭頭都無妨吖。
文：牽牛