梁頌恆同游蕙禎嘅宣誓風波越搞越大鑊，有心水清嘅市民發現，特首梁振英四年前喺會展舉行嘅就職宣誓時，都喺最後一句讀漏「香港」兩個字，質疑點解梁特又過到關呢？
學者：冇人反對當有效
八方睇番資料，當年CY率領官員宣誓，由時任國家主席胡錦濤負責監誓，CY首先用普通話宣誓，四次正確讀出誓詞中嘅「中華人民共和國香港特別行政區」同「香港特別行政區」，但讀到最後嗰句向特區負責時，卻喺「特別行政區」前讀漏「香港」兩個字，同民建聯黃定光早前喺誓詞讀漏「香港」兩個字同出一轍，但黃最後要重新宣誓但CY就冇事。
有法律界中人話，咪以為CY會因此失去特首之位，港大法律學者張達明就認為，雖然根據香港法例，宣誓者應一字不漏，但就算冇跟足而又冇人提反對，監誓者並接納，宣誓都係有效，況且CY已經做咗咁多年特首，喺法律層面已經冇挑戰佢嘅可能。八方相信就算唔會因此郁到CY，都肯定令佢再多一項笑柄。