唔知係咪受本周二澳洲策「錐心城市」墨爾本盃屈居亞軍刺激，雷神這晚回歸香港於沙田泥地夜賽搏命贏馬，好似要追番贏唔到墨爾本盃條數咁。
雷神頭場勝出告達理「踏雪名駒」後，於第三場五班一哩，隨即再贏同屬大熱門蘇偉賢馬房的「識飛」，火速起孖領先騎師王，「識飛」贏完再贏，成為繼剛周日「糖黐豆」後今季新一匹五班兩捷馬，單Win及組合獨贏A2分別派32.5及22元。
四歲馬「識飛」今季開竅大熟，上仗由雷神贏谷草1800米開齋，事隔短短兩星期，這晚人馬合作移師泥地一哩再建一功，沿途居中，半條直路後上一攻而破贏個多馬位，取勝姿態同上仗差不多一樣咁輕鬆。
今場「大道至公」後上跑第二，搭「識飛」開出20倍啡燈Q，落飛黨單是這條Q純利已1,200萬。三、四名順序「野外桃源」、「好友心」，四重彩派二萬六千幾。