沉寂一輪嘅上市架構改革，踏入諮詢尾聲，開始又再起暗湧。噚日有傳反對改革陣營發起13號（星期日）遊行，仲話搵到成2,500人咁多，由中環遮打花園行去交易所（冇人返工㗎喎），講到咁大陣仗，拎咗不反對通知書未？
有傳發起人係一直大力反對改革嘅港交所（388）董事李君豪，佢身在倫敦，回應話唔係佢發起。
立法會議員（金融服務界）張華峰就話，一直都有聽聞，但業界大部份人都冇興趣遊行，「除非搵啲唔係業界嘅人（遊行）喇！」吓，咁唔通搵臨記去行？
其實呢個反對大遊行傳咗好耐，有人「好熱心」去搞，但又講明自己唔會現身，經紀同行間都係竊笑居多，指「咁縮骨，邊個會同你癲！」聞說證券商協會主席楊玳詩都唔撐。
經紀遊行抗議都唔係冇試過，2012年遊行抗議飯鐘縮短，但始終改變唔到。今次仲話星期日去遊行，行畀邊個睇呢？