自從多年前在汕頭嘗過打冷凍魚飯，深切了解一般在香港吃到的魚飯水平相去太太太遠，卻又愛吃上了癮，解決方法：
一，趁空多來幾轉汕頭以解為食相思之苦。
二，自己學整。
為宴賓客，學曉以最簡約方法炮製黃油凍烏頭，以元朗在地「楊氏魚塘」鮮活食材煮弄，合格。自從大幅度減吃澱粉質，也非紅肉粉絲，一條零添加、無任何調味品，只摻以普寧豆醬，兩斤多重、肥美凍烏頭或寶石魚分早晚兩次吃光，另加大量青鮮蔬菜成為經常指定食糧。
老友記元朗、將軍澳「正記」老闆阿正介紹、提供魚油豐盛一夜情鹹鮮馬友引渡，簡直驚為天下至和味恩物，配Sauvignon Blanc白酒或自家浸荔枝酒，無與倫比。
汕頭「富苑」自十六年前簡樸開業，愈開愈旺，至今擴張佔用了小街幾乎四分之一；鋪陳展視打冷已煮熟、未煮熟海、陸、空食材琳琅滿目放置於六呎寬三十呎長巨形大桌之上，光看、未吃先勝已是眼球盛宴，裝潢乾淨企理、光鮮亮麗。汕頭兄批評：富苑今天太貴（相對過去、相對當地人打冷價錢水平），本地人少來幫趁啦！
汕頭富戶怎會少？
外來商人、遊客、華僑不絕，中間定有優質，甚或貴價要求，繼續以土樸街坊大牌檔打冷當然受歡迎，肯定追求再高層次滿足也不為過。
多年前享用過富苑立雜一鑊「貓魚」魚飯、滷水豬髀、醬油膏蟹、葱油螄蚶，一吃鍾情；除非今天它變得難以入口……其實更勝昔，老遠帶朋友從香港飛五小時高速公路主題美食遊，首頓晚餐？
無論如何必選富苑。
老闆知我至喜馬友，除了安排了含馬友魚飯的餐單，更送上揀手一大條予我專用。
老實不客氣，跟同枱食飯諸友清楚明示：這凍馬友，吾之至愛，謝絕分甘同味！
桌上十多樣豐盛諸物不碰，一心一意將一斤多重心頭好、專注一箸一箸吃剩魚骨頭！