澳門前特首何厚鏵有位39歲嘅姪仔何敬豐（Eric）活躍於本地金融圈，Eric上月中飛甩長盈（689），轉過個就另結「新歡」；講緊係佢辭任長盈主席後，另一隻細價股奧立仕（860）噚日就宣佈委任佢為執董兼聯席主席。
奧立仕前稱明豐珠寶，公司早前分別宣佈投資廣州同瀋陽兩個地產項目，主席兼大股東叫做張金兵。有趣嘅係，聯交所資料顯示，張金兵今年初申報持有長盈，上月變成一股都冇，長盈大股東轉為孫粗洪，家陣Eric就由長盈轉去奧立仕，乜咁啱嘅。
講番Eric，佢十分低調，做過摩通分析員，又做過德意志銀行香港分行副總裁，最爆應該係2009年，傳過佢同「賭王」三房長女何超雲拍拖，三太之後代女澄清，話佢哋只係朋友。