【美國大選 倒數6天】「中國人可能覺得被harass（騷擾）唔係一件大事，或者嗰個videotape（特朗普猥褻女性錄音）係講英文，無hit到佢哋。」在美國紐約市曼哈頓工作的港人Sovannary指，身邊的華人因為不滿奧巴馬醫保令中下階層負擔的保費大增，加上憂慮民主黨的希拉莉當選後會加稅，漠視共和黨特朗普道德操守低落的事實，傾向投富商一票。
佔中前幾個月，任職銀行業的Sovannary舉家由香港到美國生活，持加拿大護照的她，本身不是選民，但特朗普針對北美自由貿易協議的主張隨時會影響她的工作簽證，「佢當選，就多咗個理由返香港」。
「佢當選，多個理由返香港」
作為三孩之母，她亦很擔心小朋友繼續接收特朗普的侮辱女性、少數族裔等的言論，「呢度細細個就教president，教小朋友寫信畀總統，但president如果講啲咁嘅嘢，真係嚇親㗎喎，唔可以畀小朋友睇電視」。
有次她在巴士站送孩子上學，一個中國人同學忽然在巴士上大叫，「Hillary！ Hillary！」，「佢話如果Trump贏咗呢，我哋就要返去China喇。」Sovannary擔心種族歧視問題會影響下一代，「雖然暫時只係針對穆斯林、墨西哥人，但種族歧視係唔會停，佢第一次debate係不斷講China」。
最令她莫名其妙的，是特朗普的支持者，「佢講啲乜係ok嘅，但點解咁多人support佢？點解咁多人係咁自私？佢係一個癲佬，同佢電視做show一樣無變到，將美國moral㩒低咗。」但更令她不解的，是當地中國人的取向，「好多中國人支持Trump，因為錢字掛帥，Obamacare幫無醫療保險嗰啲人，令到啲中下階層premium（保費）要畀多好多」。
「其實幾sad，中國人可能覺得被harass（騷擾）唔係一件大事，或者嗰個videotape（特朗普猥褻女性錄音）係講英文，無hit到佢哋，無咁offensive，同埋（第一夫人）Michelle Obama講嘅嘢（反對侮辱女性的講話）又係講英文㗎，可能又隔咗一重。」
當繙譯義工 助華人投票
她相信華人若沒有語言障礙，不會落得如此局面，故選舉日她會在票站擔任廣東話繙譯，「如果中國人因為語言唔通，唔識得投票而唔去投，係好可惜」。
本身是基督徒的她，家住華爾街，她的教會平日會向無家者、低收入人士派發麵包，每年一次和他們一起用餐，今年她首次參與，發現很多中國人，卻只有她和另一人懂英文，「原來社區好多人有需要，所以我先諗到去做繙譯，有啲人因為唔知點樣投票而唔去投票，（繙譯）可以幫到佢哋」。
緊貼選情 即睇【美國大選】專頁：
http://hk.apple.nextmedia.com/uselection2016