特首選戰提早開跑，自然各種消息滿天飛，好似噚日有報章爆財爺曾俊華，竟然得唔到中央鼓勵參選，不過八方見佢噚晚出席醫學博物館20周年籌款晚宴，依然有笑容，但就例牌封口乜都唔講，所以同場焦點，就走咗去另一位疑似特首參選人梁錦松身上。
梁錦松是否得到中央祝福，八方真係唔知，所以佢一到會場，八方就衝埋去問，佢會唔會去馬？點知佢唔只口密，連笑容都欠奉，不過到佢主動搵曾俊華傾偈同合照嗰時，就笑到停唔到喇。
其實同佢兩位合照嘅，仲有港鐵主席馬時亨 ，聽聞佢之前好撐梁錦松出嚟選，𠵱家起碼都多咗個胡官，咁佢𠵱家撐邊個？馬主席係慷慨嘅，用「呀嘿」兩聲笑聲答咗八方，唔知係咪都想睇定啲先呢？其實想睇定啲先嘅，仲有上屆醫學界選委票王蔡堅，堅叔話𠵱家唔使急，留番自己真係當選選委，先至逐位特首參選人慢慢斟。