前日萬聖節咁開心，寶查BB全裸益街坊？人嚟！邊度有冇格版本，重酬！但認真一睇，嗰兩條黑色bar唔係傳媒加上去，而係寶查BB包到實之後再黐上去嘅，要嚟惡搞美國真人騷女星Kim Kardashian嘅自拍裸照。
星期一晚係萬聖節，香港都唔少人扮鬼扮馬去蘭桂坊玩，而外國班體育明星亦玩得好癲。
最出位嘅係走玉女路線嘅加拿大網球手寶查，同朋友一齊扮Kim Kardashian影「裸照」，但寶查形象清純，當然唔會真係剝光豬啦！佢着住肉色嘅背心同短褲，喺三點位置仲黐埋黑色紙條，所以係冇野睇到㗎，但呢張相喺ig都吸到成四萬個like！
為咗扮身材勁爆嘅Kim，唔算太有料嘅寶查費盡心思升cup，佢後尾自拍咗條片放上網，喺件小背心入面抽咗好多條毛巾出嚟！原來塞咗咁多嘢先造到波濤洶湧嘅效果，真係辛苦晒！
Aerobic細威同「小丑」咸仔開P
另一位女網球手「丹麥甜心」禾施妮雅琪就收埋副身材，淨係突佢個靚樣出嚟，因為佢扮南瓜。至於「細威」莎蓮娜就以80年代嘅aerobic look去P，同場有唔少體壇巨星㗎！好似佢隔籬呢位小丑，大家認唔認得？係F1車手咸姆頓！