巴塞隆拿「MSN」當中，蘇亞雷斯被人認為腳法及唔上美斯同尼馬。不過「三間」嘅宣傳短片，似乎想幫阿蘇平反，短片安排工作人員喺35米高嘅平台放個波落地，阿蘇都輕鬆控得定（圖），連身邊嘅美斯都讚好。其實美斯上年都玩過將個波踢到18米高然後再控定，高度就及唔上阿蘇，不過自己踢自己控，難度更高；話時話，個波咁高跌落嚟，就咁用腳控會唔會好痛呢？
