胡官出場，令人想起湊佳苗文庫中有一本名字叫做「為了N」。胡官出台，是為了那一位「N」嗎？
齊心心戰室連夜密會，分析那個N到底是不是hea十年的傢伙。戰友咬牙切齒：「一定係，明明喺中場，無端端走位殺入禁區，實係博十二碼或者係打掩護，我們得高規格嚴防對方忽然起腳遠射得手！」
咁，有乜回防策略？「還治其人之身，學佢哋咁搵個老翻胡官出來，幫我們擋箭。」
咁，邊個肯捱義氣？「垃圾桶！」大家劍指粒聲唔出的劉華。但戰略大佬即時拍枱推翻，指劉華弱雞得滯，三號波都吹得翻。
「胡官法律界，我們搵娛樂界頂佢爛市！好佬怕潑婦，呢招實管用。」幾個戰友爭寫提名表格，提議一：愛國元老阿姐。反對理由是：「龍蝦會呷醋，黑面唔好睇。」提議二：親建制到嘔的肥嫲。反對意見是：「佢似國產肥肥，面口卻太過賓賓，抹窗可能啱使，選戰嫌唔夠班。」戰友陸續提名瘋華哥、低智森和絕對唔會爆的中國龍爺。胡官以一敵三，打麻將的話實出銃輸死！狼特到時殺出來抽水收枱，擸走晒枱面籌碼，佢一心一意對付呢班三流雀友，大殺七方都有凸！