珠寶公司賣廣告好鍾意sell溫情同感動feel，本地品牌謝瑞麟（417）本身已經係一個感人故事。大家應該記得多年前創辦人兩父子入獄，要由謝瑞麟新抱邱安儀支撐大局。兩父子出獄後，2011年重返公司，但極為低調，噚日公司終於宣佈將太子爺謝達峰升為副行政總裁，再擔大旗。
謝達峰升職前負責貨品供應，轉做副行政總裁之後，就由採購、拓展銷售網絡、建立品牌，乜都關佢事，做番話事人。工作量多咗，人工自然有得加，佢底薪增加八成，去到240萬元；另外，一年最多獲發花紅180萬元，即係年薪可以去到420萬元。佢老婆邱安儀舊年年薪400萬元，即係兩公婆每年大約袋走800萬元。
老婆支撐大局多年
今年79歲嘅謝瑞麟其實早於2000年交棒，由謝達峰擔任公司主席8年，直到2008年，兩人被廉署檢控罪成入獄，先至由謝太主持大局，佢都捱咗一段日子。
謝太本身係靚太，兼且笑容可親，近年做埋公司生招牌，都好得人鍾意。市場應該會關注謝達峰做番公司話事人之後，謝太會否退下火線，或者減少工作量，但無論如何，謝太應該要繼續做公司董事，事關謝生唔入董事局㗎。