星期一場英超獨腳戲係由史篤城迎戰史雲斯，我求大俠初時見到呢個戲碼，都擔心喺香港時間凌晨四點爬起身睇波會「嘥心機，捱眼瞓」，點知場波娛樂性十足，喺開波三分鐘就由倒戈嘅韋菲特邦尼接應隊友祖阿倫嘅妙傳射入，為史篤城先開紀錄，之後入球梅花間竹，最後史篤城以3:1勝出。
祖阿倫兩助攻予邦尼
喺呢場波邦尼梅開二度固然係贏波功臣，不過有兩個助攻、同樣踢過史雲斯嘅祖阿倫亦表現可圈可點，有球迷仲喺社交網站將祖阿倫化身做耶穌，因為佢實在係勁囉！祖阿倫今季由利物浦轉會史篤城後，演出越嚟越搶鏡，佢賽後就話係同位置上嘅改變有關：「我𠵱家係球隊嘅10號仔，可以好自由咁喺球場上派牌同埋走上走落；不過，我覺得自己仍然有進步嘅空間㗎！」