喺九月「摸底風波」之後，薯片叔叔被迫同689開記者會，仲爆出金句「You always agree with your boss（你永遠都要同意上司）」；但薯片叔叔演技唔掂，啲表情出賣晒佢，擺明佢同689就唔妥。喺曼聯，中場舒韋恩史迪加（小豬）亦遇上薯片叔叔嘅情況，面嗰層做足「You always agree with your boss」，但一出到公眾場合，對住領隊摩連奴黑晒面。就算球會要佢哋做吓騷，企埋一齊影相，佢兩個都貌合神離。
小豬識撈跟番一隊操
摩連奴季初都講明小豬今季好難有得踢，仲將佢踢出一隊，英聯盃都唔搵佢踢。但事情喺禮拜一有轉機，摩佬突然搵番小豬去一隊操練，夜晚小豬仲獲准同一班隊友出席聯合國兒童基金會嘅籌款晚宴。唔少球迷都好開心見到小豬返一隊，都話小豬終於捱出頭。自從被摩佬打入冷宮後，小豬做到面面俱圓，成日入場睇曼聯比賽，又喺社交網站幫球隊打氣，仲會上載同老婆「伊娃」齊齊操「弗」自己嘅相，做訪問亦完全冇講過摩佬同曼聯一句壞話。可能見到小豬咁聽教聽話，加埋安達靴里拉將會停賽所以等人用，摩佬就網開一面，調番小豬同一隊操練。
籌款晚宴兩個面左左
雖然小豬呢次危機管理做足100分，但公開場合見番摩連奴，嗰種怨恨就自動浮上塊面度。喺慈善晚宴，我求大俠都諗住睇吓WAGs，但女呢樣嘢就成日有得睇，摩佬同小豬企埋一齊嗰種精采畫面就更難能可貴。唔知球會係咪有心嘞，喺台上大合照嗰陣，安排小豬企喺摩佬隔籬，但睇番啲相，佢哋冇乜交流，兩個人都苦口苦臉咁，就好似薯片叔叔同689坐埋一齊咁樣，一睇就知面不和心亦不和。至於左閘勞基梳爾可能太後生，未摸得清上意就跳出嚟話：「好開心見到小豬返嚟，佢喺更衣室同場上都好有影響力，尤其對我呢啲年輕球員。」梳爾讚到小豬咁行，係咪暗示摩佬雪藏小豬係錯誤嘅決定？我求大俠擺明係用陰謀論諗嘢㗎嘞，但唔知梳爾嘅boss摩佬又會唔會咁諗呢？梳爾，方丈好小氣㗎，小心做下個小豬呀！