特首戰開鑼，但最終決定下任特首誰屬嘅，大家心知肚明唔係千二人嘅選委會而係國家主席習近平嘅決定。如果習核心決定咗，梁振英同財爺曾俊華就唔使講啲唔講啲啦；既然係由習核心話事，佢點樣諗就係關鍵。
原來5年前嘅今日，時任國家副主席嘅習近平喺北京會見香港廣東客屬社團總會訪京團時，提到香港各界要以包容共濟、促進和諧嘅態度，共同面對挑戰，亦即係之後所講嘅求發展、求穩定、求和諧。睇番CY近年最受批評嘅問題，就係佢撕裂香港，所以ABC建制派先想曾俊華做特首以保香港和諧；唔知習核心𠵱家諗番，覺得CY符唔符合佢提嘅要求？
而不得不提係近期越戰越勇嘅新民黨葉劉淑儀，當年此時都好有戰意，回應備選特首中嘅CY民望高企時更加話：「（因）未放我個名落去（民調）」。當年今日嘅跑馬仔，一樣遍地花生。