美元上周五突然急回，人民幣略為回穩，對港股嚟講理應係反彈機會，點知星期一都仲要跌20點，仲有超過800隻股下跌，一嚟市場唔覺得人民幣貶值已經完結，二嚟反映市場承接力麻麻，再加上睇完內銀業績，盤數整容整到面目全非，外資肯定冇晒胃口，睇唔出有人肯出嚟掃貨嘅勇氣。
恒指稍後要出現一輪頗急跌勢，夠平先至重新吸引投資者再度入場，喺23000點以上承接力依然麻麻去計，似乎點都有一千幾點去跌。
指數以至大價股、二三線股都會差啲，惟獨殼股近兩個月炒風頗盛，賣殼股隔三幾日點都有一隻誕生，連富臨（1443）都傳有復星（656）想爭，反映資金對殼股需求頗盛。而殼股強勢亦象徵一點，就係內地早已非舊年下半年至今年初咁樣鎖國，近期重啟資金流走之門，不過，資金流走得多就可能又要落閘，銀聯限制保單無限碌卡，或顯示中央又要防走資，又做緊嘢，反正市況不就，寧願hold多啲cash睇住走資問題點樣發展，等機會再撈過。
晉佳
http://fb.com/advanceguy1