絕世好馬「巴基之星」上場初嘗敗績跑第二後，好多馬迷都期待牠再上戰陣，希望可以收復前失重響勝鼓。而練馬師告東尼亦已為牠報名周日（11月6日）沙田草地二班1400米。不過，「巴基之星」屆時未必可以出賽，並非牠的健康有問題，而係今日（31日）報名表公佈，「巴基之星」被列為後備一。
「巴基之星」做不成正選，主因告東尼可能冇諗過報名馬咁踴躍，無出王牌為牠報名，相反如果肯出王牌，「巴基之星」就可以將此場唯一冇王牌兼冇保護權的「健康歡笑」踢走，取代「健康歡笑」的正選席位。
當然，若本周六中午12時受注前此場有馬退出，「巴基之星」可補上參賽，但就算補上，始終要面對「健康歡笑」這匹新勝同程1400米、大有進步的當起惡馬，告仔今次慳咗張王牌，算不算棋差一着呢？