NBA比賽除咗緊張刺激，有時都會搞啲花臣等球迷輕鬆吓，好似周日常規賽太陽主場對勇士嘅太平洋組之戰，太陽就整咗個「獅子王鏡頭」，當場邊鏡頭影到帶BB入場嘅觀眾，觀眾就要模仿卡通電影《獅子王》拉飛奇抱起小辛巴一幕咁抱起個BB，場面又溫馨又搞笑。唔止咁，太陽呢場波仲有個搞笑場面，就係主力後衞比歷素（Eric Bledsoe）件波衫連名都寸錯，將Bledsoe印錯做Beldsoe，唔知錯版波衫會唔會炒得起？
勇士內線輸蝕贏得險
勇士呢場波贏106:100，揭幕戰不敵馬刺後已經兩連勝，杜蘭特（Kevin Durant）仲轟入加盟後新高37分，不過球隊整體表現就認真唔掂，堂堂上季西岸冠軍，第一節就俾西岸尾二嘅太陽打出16:0嘅攻勢，要到第二節先反超前，喺第四節亦試過俾太陽反超番；好彩，杜蘭特同史堤芬居里（Stephen Curry）等入罰球奠勝。
成場比賽入面，勇士只係拎到43個籃板，比起太陽50個少好多，內線防守仲未有改善。勇士教練卡爾（Steve Kerr）賽後就話：「我哋應該打得更聰明更頑強，好彩𠵱家仲有時間調節。」