今年6月18日，人稱鵬哥嘅行山發燒友張善鵬，獨自去西貢北潭涌行山。經過大枕蓋，佢發現天色轉差，大約早上10時喺Facebook出post話想落雨，嗰頭個天就即刻用驚天雷「回敬」佢。鵬哥留言大叫「好邪」，跟住急急腳落山。不過，到佢喺入山囗見雷雨雲似乎過咗，於是改變主意，繼續行程。
誰不知，鵬哥自此失去同外界嘅聯繫。直到6月21日晚上10時許，佢終於喺鹹田灣遇上警察，而身體只有輕微損傷，總算平安無事執番身彩。究竟佢喺呢四日三夜（近85小時）發生過乜事？同時喺冇食過嘢嘅情況下點樣「保住命仔」？事發半個月後（7月3日），鵬哥喺facebook貼咗一篇三千字嘅文章，交代佢呢個「奇幻之旅」......
「開始落山時還蠻順利的，但下了大約幾十米後又好似唔多對路，好似怎行同目標距離都無縮短到......覺得迷迷糊糊……不知怎地沒能下山，返而轉了入山谷裡……途中竟然又望見對面山係個好似沙嶺咁樣嘅墳場。雖知有墳埸就一定有路走，但西貢西灣－帶何來有墳場，呃我唔倒(到)嘅！果然轉眼又變返樹林......」（節錄自張善鵬facebook）
究竟當中描述係真定假？當然只有鵬哥知道，不過有人話係佢嘅幻覺，又有人話佢進入咗異度空間、或者係西貢隱藏嘅「結界」......
蘋果動新聞特意根據鵬哥facebook貼文嘅描述，將一幕幕曲折離奇嘅經歷以動畫形式重現大家眼前。
此外，一部3個月前發表嘅網絡小說竟然疑似預言左鵬哥事件，想知更多﹖請收睇同日另一則動新聞：【西貢結界2】張善鵬結界事件 網絡作家孔明早有預言