投資者向來對內地食品股好敏感，怕食安出事，所以食品股來港招股，例牌畀投資者試食，但內地賣滷水鴨製品賣到出晒名嘅周黑鴨（1458）舉行投推同記招，都反其道而行，冇試食。
但其實試食對周黑鴨好重要㗎，此話何解？事關內地有太多山寨周黑鴨店，內地媒體形容，數量比官方店仲多，就連華華都親身中過招呀。
話說華華今年8月北上潮州，見到有間裝修幾四正嘅周黑鴨就去試吓，點知鬼咁難食。當時都唔知道原來食到假貨，直到近日細讀公司招股書先知，原來周黑鴨舊年開始，冇再推出散裝滷味，全部改用MAP（氣調包裝）同真空包裝。
華華幫襯嘅「周黑鴨」，食物係按重量計，兩個鴨腎賣十元八塊。唔睇招股書都唔知自己中伏，到底食咗乜嘢落肚……
問到公司如何打假，執董郝立曉就話，信政府嘅資產保護工作，發現假店會同各部門投訴，會民事起訴假店，影響惡劣就考慮刑事追訴。唉，聽到咁長遠嘅解決方法，難怪山寨店咁多喇。