有時啲嘢，真係爭得到都未必好，新民黨田北辰會唔會別有一番滋味在心頭？如果真係撼低經民聯梁君彥做立法會主席，呢幾排肯肯定畀宣誓風波煩死，點會仲有時間落區，同居民同樂玩返日？
其實田二少唔似外表咁嚴肅嘅，有時都鍾意扮鬼扮馬，周六趁萬聖節前夕，佢就化身大南瓜（圖右），落區出席「田叔叔工作坊」活動，憑住應節造型，成為街坊嘅影相佈景板。田二少搞笑話，以佢嘅形象，理應扮有型有款嘅「尼古拉斯‧田」伯爵，點知同事同佢講，驚扮吸血殭屍會嚇親細路，話扮南瓜會好好多。
嗱，係男士都想型，未必想咁卡娃依，所以田二少不諱言，覺得套南瓜衫唔係好襯佢㗎，但至緊要當然係街坊鍾意。咁多街坊同佢selfie，相信都好滿意佢呢個cutie造型！